Х.ХАТАН
Монголын хөгжмийн урлагийн түүхийн хуудсанд дахин давтагдашгүй гайхалтай тоглолт нэгээр нэмэгдлээ. Энэ бол хөгжмийн зохиолч, төгөлдөр хуурч, Sweetymotion” хамтлагийн продюсер Б.Чинбатын “Аравт” түүхэн киноны хөгжмөөс бүтсэн “Эзлэн” тоглолт юм. Симфони оркестрын гайхамшигт дуугаралт, үзэгчдийн тасралтгүй нижигнүүлэх алга ташилтан дор хоёр цаг гаруй үргэлжилсэн энэхүү тоглолт хүмүүсийн сэтгэл зүрхийг, оюун бодлыг эзэлж чадсан.
Тоглолтын эхний хэсэгт “Аравт” түүхэн киноны хөгжмийг арынх нь том дэлгэцээр гарах үйл явдалтай хоршуулж Улсын филармонийн симфони найрал хөгжимчид, Хилийн цэргийн дуу бүжгийн чуулгын найрал дуучид, Хөгжим бүжгийн коллежийн цохивор хөгжимчид хамтран тоглолоо.
Хоёр дахь хэсэгт “Sweetymotion” хамтлагийн Ц.Сарнай, Э.Ганболор нар хамтран хөгжимдсөн нь тоглолтын сюрприз байв. Мөн эх орондоо төдийгүй дэлхий даяар Монголын үндэсний урлагийн нэрийг өндөрт өргөж яваа ятгын хатан хаан гэгддэг Ч.Мөнх-Эрдэнэ, “Домог” хамтлагийн морин хуурч Д.Шинэцог/гени/, “Хөсөгтөн” хамтлагийн лимбэчин Г.Адъяадорж, ёочин хөгжимчин Н.Шүрэнцэцэг нар үндэсний урлагийн яруу сайхныг үзэгчдэд мэдрүүлсэн гайхалтай тоглолт болж чадлаа.
Үндэсний дуу бүжгийн эрдмийн чуулгын авъяаслаг хөгжимчдөөс бүрдсэн “GLISSANDO” хамтлагийн бүсгүйчүүд “Эзлэн” тоглолтыг чимж, яруу тансаг, уян зөөлөн хөгжмийн дугаралтуудыг шанзны гайхалтай хэмнэлээр үзэгчдэд хүргэсэн.
УДЭТ-ын жүжигчин Д.Ганцэцэг тайзнаа”Омбол” охины дүрээр гарч ирэн шуранхай хадаан дуулж үзэгчдийн сэтгэлийг хөдөлгөж орхив. Омогшил, омгорхол, бахдал төрүүлсэн яруу тансаг аялгуунуудыг удирдаачийн уран яруу хөдөлгөөн, удам дамжин өвлөгдсөн хөгжмийн гайхалтай мэдрэмжээрээ удирдаж байсан юм.
Хүүхэд байхаасаа л “Улсын ардын дуу бүжгийн чуулга”-д аав ээжийгээ даган очиж алдар цуутай уран бүтээлчдийн өвөр дамжин тоглож дуучин, бүжигчин, хөгжимчин, удирдаач болон тоглож байсан түүний мөрөөдөл ийнхүү “Улсын цирк”-ийн алтан тайзнаа 20 гаруй жилийн дараа биеллээ олсныг дурсана лээ.
Ийнхүү хөгжмийн зохиолч, төгөлдөр хуурч, Sweetymotion” хамтлагийн продюсер Б.Чинбатын “Аравт” түүхэн киноны хөгжмөөс бүтсэн “Эзлэн” тоглолтын хаалт Улсын циркт өнөөдөр болно.
