Уржигдраас “Хүний хөгжил сан”-гийн 23 мян­ган төгрөгийг банкуудаар тарааж эхэлсэн. Хугацаа­наасаа дөрөв хоногоор хоцорсон учир хүлээлт үүссэн байжээ.“Ка­пи­тал” банкны 915-р тооцоо­ны төвийн гадаа 200 гаруй хүн өглөөний 05 цагаас эхлэн дараалал үүсгэн хүлээжээ. Тэдний олонхи нь өндөр настан, нярай хүүхэдтэй, тэргэнцэртэй иргэд байсан юм.  Иргэд болон банкны ажилчдын хооронд үл ойлголцол үүсч байлаа. Учир нь өнөөд­рөөс 670 мянган төгрөгийг олгоно гэж ойлгосон хүн олон байв. Иргэд энэ талаар ийнхүү ярьж байна.

Иргэн В.Отгонцэцэг:

-Засгийн газар дөрвөн жилийн өмнө өгнө гэж амласан мөнгөө өнөөдрийг хүртэл өгөөгүй. Сонгууль дуусахаар мөнгө олгохгүй гэсэн учир өдөр шөнөгүй хүлээж байна. Бидний амьдралд энэ мөнгө бага ч гэсэн нэмэр болдог. Харин илүү хялбар аргаар тараах хэрэгтэй.

Иргэн Б.Баатар:

-Төрөөс бэлэн мөнгө тараах нь буруу. Энэ мөнгө тэр өдөртөө л архи болон хувирч, гэмт хэрэг ихэсч, гэр бүл салахад хүрч байна. Уг нь үйлдвэр, эмнэлэг, сургууль барьсан бол бидэнд илүү үр өгөөж­тэй. Миний хувьд үлдсэн мөнгөө хувьцаа хэлбэрээр авах хүсэлтэй байна.

Ахмадууд хишиг, хувийн үлдэгдэл болох 670 мянган төгрөгөө бэлнээр авах хүсэлтэй байгаа бол залуус хувьцаа нь дээр гэж байлаа. Одоогоор банкуу­дад 670 мянган төгрөгийг хэзээ олгох асуудлаар ямар ч мэдээлэл ирээгүй гэв.

Капитал банкны 915-р тооцооны төвийн эрхлэгч Т.Наранбат:

-670 мянгын санхүү­жилт ороогүй байна. Ха­ламжийн тө­вөөс ирүүлсэн мэдээл­лээр сонгуулиас өмнө олгоно гэсэн. Хэрэв энэ талаар мэдэхгүй бай­вал утсаар лавлаж болно. Заавал ин­гэж хүлээлт үүсгэх шаард­лагагүй.  Бид орой бүр маргаашийн гүйл­­гээ­нийхээ талаар зар­лал тавьдаг. Санхүү­жилт ор­сон тохиолдолд хороогоор нь хувиарлаж, олгож эхэл­нэ. Иргэд сар бүр хишиг, хувиа авахдаа заа­вал ингэж дараалал үүсгэх албагүй. Карт, утасны үйлчилгээ гээд сонголт олон байсан.