Үндэсний аудитын газраас “Эрдэнэс таван толгой” компанийн үйл ажиллагаанд шалгалт хийж хэд, хэдэн ноцтой зөрчлийг ирүүлсэн байна.

Зөвлөх компаниуддаа гэрээнээс гадуур мөнгө шилжүүлсэн, монгол, гадаад ажилчны цалин маш их зөрүүтэй, ТУЗ-ийн гишүүдийн эрх ямбад их хэмжээний мөнгө зарцуулж байгааг баримтаар нь илрүүлжээ.

 “ARUDU” зөвлөх компанийн гэрээгээр гүйцэтгэсэн ямар ч ажил байхгүй байхад 405.4 сая төгрөг, “Norwest corporation” компанид гэрээнээс гадуур 277.7 мянган ам.долларыг олгосон. Мөн “PriseWaterhouse Coopers Audit” компанид 76.8 сая төгрөгийг илүү олгосон гэжээ. Түүнээс гадна компанийн удирдлагууд өөрсдийн дураар ТУЗ-ын даргын цалинг зургаан сая, гишүүдийнх нь цалин 1.8 сая төгрөг болгож өсгөсөн нь хууль зөрчсөн байна.  Цалингийн нэмэгдлийг Төрийн өмчийн хорооноос тогтоох ёстой ажээ. Дээрээс нь гадаад ажилчдын авч байгаа цалин монголчуудын авахтай харьцуулахад тэнгэр, газар шиг ялгаатай гарч. Тухайлбал, 353 монгол залуу 909 мянган төгрөгийн цалин авч байгаа бол гадаадын 18 залуу түүнийг нь хэд дахин нугалсан өндөр цалин авч байгаа нь шалгалтаар илэрсэн байна. Тэр ч бүү хэл, тухайн гадаад мэргэжилтнүүд нь орон байрны хангамжаас эхлээд эрх ямба эдэлдэг байсан гэнэ. Одоогоор  “Эрдэнэс Таван толгой” компани  “Нүүрс нийлүүлэх, худалдан авах гэрээ”-ний дагуу үүргээ биелүүлээгүй, нүүрсээ борлуулаагүйгээс болж “Чалко трейдинг Хонконг” компаниас авсан зээлийн хүүг хоёр дахин нэмэгдүүлсэн дүнгээр төлж байгаа юм байна. Хүү төлж багагүй хэмжээний алдагдал хүлээж байгаа учраас Хөгжлийн банкнаас 2012 онд 100.0 сая ам.долларыг таван жилийн хугацаагаар, 100.0 сая ам.долларыг нэг жилийн хугацаатайгаар зээл авчээ. Мөн “Голомт” банкнаас 2013 онд нэг жилийн хугацаатайгаар 12.0 сая ам.доллар, Худалдаа хөгжлийн банкнаас таван сарын хугацаагаар 45.0 сая ам.доллар, Хас банкнаас нэг жилийн хугацаатайгаар 8.0 сая ам.долларын зээл авсан байна. Аудитын шалгалтын дүнд “Эрдэнэс Tаван толгой” компанийнхан ямар байр суурьтай байгааг тодруулахад хэвлэлийн төлөөлөгч гэх бүсгүй “Аудитын шалгалт эцсийн тайлан нь биш шүү. 2013 оны гурван улирлыг хамаарсан байгаа. Тэгээд ч ярилцлага авъя гэж байгаа бол надтай уулзах цаг аваад асуух зүйлээ тодорхой хэл. Тэгж байж уулзаж болох юм” гэсэн хариулт өглөө.