Хамгийн олон бие даагчтай тойрог

11-р сарын 1, 2012 11:05 am Нийтлэгч: Ангилал Сонгууль , Улс төр Уншсан: 249

Сонгууль-2012

Л.ХЭРЛЭН

 Зүүн бүсийн төв Дорнодын тойрогт  орон нутгийн сонгууль нэлээд маапаантай байдлаар өрнөх  дүр зураг байна. Тэр ч бүү хэл,   анхнаасаа л бүрхэг асуудлууд дэндүү олон байна, тэнд. Аймгийн ИТХ 35 суудалтай бол орон нутгийн сонгуульд нийтдээ  88 хүн нэр дэвшжээ. Түүнээс 18 нь бие даагч гэж байгаа.  Бие даагч эрхмүүдийн  10  гаруй нь УИХ-ын сон­гуульд бие дааж сон­гогдсон Х.Болорчулууны хүн гэх тодотголтой. Цаашилбал, орон нутгийн сонгуулиар олонхи болж чадвал АН-д элсэх сонирхолтой юм байх.   Орон нутгийн сонгууль хараахан эхлээгүй ч Дорнод аймагт сонгуу­лийн оршил, цомнол  аль эрт яваад эхэлчихсэн нь энэ.   АН-ын хяналтын  ерөнхий хороо  гэхэд л  сонгууль угтан  хуралдаж, Дорнод аймаг дахь АН-ын  дэд дарга нарынхаа  нэр дэвших эрхийг  хасчээ. Ингэснээр олонд танигдсан нэр дэвшвэл нэлээд  магадлалтай нөхдүүд хашааны гадна үлдсэн байна. Гэхдээ ингэж хасахгүй бол болохгүй хэргийг дээрх эрхмүүд өдүүлсэн гэх. Аймгийн АН-ыг удирдаж байсан дэд дарга Д.Баатархуяг, Ц.Хаснаа нар УИХ-ын сонгуулиар өөр намыг дэмжсэн учраас нэр дэвших эрхээ хасуулаад зогсохгүй намын дүрмээр хөөгдсөн гэнэ.  Гэхдээ энэ нь дүр эсгэсэн байдал, ямар  нэгэн тохиролцоо хийж “жүжиг” дэглэсэн байх магадлалтай гэнэ. Учир нь  АН засаг барьж бай­гаагийн хэрэг юусан би­лээ, орон нутгийн сон­гуульд ялалт байгуулна гэдэгтээ итгэлтэй байгаа гэх хүн олон байна. Итгэлтэй байхаас ч арга алга. Учир нь МАХН-МҮАН-ын “Шударга ёс” эвслээс нэр дэвшигчдийг бичиг, баримтын бүртгэл дутуу нэрээр  бүртгээгүй. Тиймээс  тус эвслээс  аймгийн төвд хоёр хүн бие дааж нэр дэвшсэн бол  харин хөдөө  сумдад  нэр дэвшигч олон байна. ИЗНН ч  мөн адил.  Олонхи нь бичиг, баримтын зөрчил­тэй, цагтаа ирж амжаагүй гэх шалтгаанаар хасагджээ. АН итгэлтэй байгаагийн бас нэг шалтгаан нь тус аймаг дахь АН-ын дарга шинэ хүн болжээ. Өмнөх дарга  нь хэл аманд орооцолдож намынхаа нэр хүндээс доош чангааж байсан бол энэ удаа цагаан морин жилийн хувьсгалын тэргүүн эгнээнд тэмцэж явсан Цэрэнчимэг гэдэг эмэгтэй намаа тэргүүлэн орон нутгийн сонгуульд оролцоно.

МАН-ын хувьд нөхцөл байдал тун бүрхэг байна. Дорнод аймаг дахь МАН-ын даргын сон­гуульд  нэр цэвэр гэсэн шалгуураар  М.Бадам­сүрэн  гэдэг залуу сонгогдсон.  Энэ суудалд горилж очсон  УИХ-ын гишүүн асан Д.Одбаярыг  намын гишүүд нь ч, иргэд, сонгогчид   ч дэмжсэнгүй. Ингээд аймгийн Засаг дарга болох мөрөөдөлд нь цэг тавьж орхиж. Гэхдээ  аймгийн МАН-ын шинэ даргыг   Д.Одбаярын гарын хүн гэлцдэг  бол  Н.Номтойбаярт урвасан, Ардын намыг МАК-ийн нам  болгох гэж байгаа гэх сөрөг сурталчилгаа газар авчээ. 

Дорнодын орон нутгийн сонгуулийн өнгө иймэрхүү. Гэхдээ  өнгөн дээрээ ийм ч, өгөх дээрээ иргэд хэнийг ч сонгож  мэднэ гэх хүн олон байна.

 

Сэтгэгдэл бичих

Таны и-мэйл хаягийг нийтлэхгүй.

Сэтгэгдэл *
Нэр *
E-Mail *