Э.Лхагвасүрэн: Сургалтын арга барил, авьяасын хүчээр хошой аварга боллоо

3-р сарын 28, 2013 10:24 am Нийтлэгч: Ангилал Спорт , Урлаг, спорт Уншсан: 906
Манай улсад сүүлийн үед эрчимтэй хөгжиж буй спор­туудын нэг нь ши­рээний теннис.

Д.ЖАВХЛАН 

Манай улсад сүүлийн үед эрчимтэй хөгжиж буй спор­туудын нэг нь ши­рээний теннис. Хэдхэн хоногийн өмнө уг спортын насанд хүрэгчдийн аварга шалгаруулах тэмцээн болж спортын мас­тер Э.Лхагвасүрэн түрүүлж улсын хошой аварга болсон билээ. Түүн­тэй цөөн хором ярилцлаа.

 

-Спортоор хичээллэх­дээ хүүхэд, залуучууд ихэвчлэн амжилт гаргах боломжтой төрлүүдийг сонгодог. Бокс, бөх гэх мэт. Гэтэл ширээний тен­нис энэ өнцгөөс харвал бараг л найдваргүй спорт. Чухам яагаад ширээний теннисийг сонгосон бэ?

-Би 11 настайгаасаа ширээний теннис тоглож эхэлсэн. Аавынхаа нөлөө­гөөр энэ спортод анх та­тагдсан. Би ааваасаа яа­гаад бокс ч юм уу, бөхөөр явуулаагүй вэ гэж асууж байсан. Багадаа би бие муутай хүүхэд байсан юм билээ. Надад хүчний спорт зохихгүйг мэдээд теннис рүү чиглүүлсэн байх. Тэр үед Азийн аварга Пак Чен Хо Монголд ирж 10 гаруй насны хэдэн хүүхдэд тен­нисний суурь хичээл заа­сан. Би тэдний нэг. Тэр хүний сургалтын  арга барил, авьяасын хүчээр би 25 насандаа улсын хошой аварга боллоо.

-Улсын аваргын төлөөх тоглолтод мөнхийн өр­сөлдөгч Л.Алтантулгатай үлдсэн байх аа?

-Тийм. Энэ жилийн улсын аваргад ОУХМ Л.Ал­тантулга, өнгөрсөн спартакиадын аварга З.Төр­болд, мөн улсын хошой аварга Б.Баяр­маг­най зэрэг шилдгүүд хагас шигшээд шалгарч үлдсэн. Ингэснээр тэмцээн улам өрсөлдөөнтэй болсон юм. Аваргын төлөөх тоглолтод хашир мастер Л.Алтантул­гатай таван үе тоглосноос дөрөвт нь ялж хошой авар­га боллоо. Би түүнтэй энэ тэмцээний өмнө хоёр ч удаа таарахдаа дараалан ялагдаж байлаа. Тиймээс Л.Алтантулга миний хам­гийн хүчтэй өрсөлдөгч  юм.

-Таны тоглолтын арга барилыг хамгийн сайн мэдэх хүн бол Л.Алтан­тулга. Түүнтэй хэдийгээс тоглож эхэлсэн бэ?

-Л.Алтантулга солон­гос багшийн дугуйланд надаас жилийн өмнө ор­сон. Тухайн үед арай цөөн хүүхэд хичээллэдэг бай­сан гэсэн. Тиймээс сур­галтын үр дүн, туршлага арай илүү хуримтлуулсан болов уу. Бид хоёр өсвө­рийнхний олон тэмцээ­нээс эхлэн хоорондоо таарч өрсөлдсөн. 2007 оны дэлхийн өсвөр насны уни­версиад наадамд хосын төрлөөр оролцож медальт байрт шалгарч байлаа. 

-Тамирчид ширээний теннисний спорт өндөр хөгжсөн Герман, Хятад, Солонгос, Франц зэрэг орнуудын арга барилаар тоглодог. Харин манай тамирчдад аль арга барил нь зохимжтой вэ?

-Би теннисний цохиур барьсан цагаасаа л бүх­нийг солонгос багшаасаа сурсан ч монгол хүний онцлогтой, өөрийн гэсэн арга барилтай гэж боддог.  

-Таны аав Монголын пинг-понгчдыг олон улсын тэмцээнд оролцох зардлыг зохицуулах зэргээр бүх талын дэмжлэг үзүүлж ирсэн. Харин та энэ спор­тоор оргилд нь хүрэх гэж тэмүүлсээр яваа. Том зорилгын эхлэлийг ам­жилт­тай тавьж чадсанд баяр хүргэе?

-Баярлалаа. Энэ са­рын эхээр БНСУ-ын оюут­ны аварга шалгаруу­лах 30 дахь удаагийн тэм­цээн болсон. Тэд манай улсын оюутны шигшээ багийг урьж оролцуулсан. Тэр тэмцээнээс манайхан гурван төрөлд медаль хүр­тэж, багийн дүнгээр нэг­дүгээр байр эзэлсэн. Би хосын төрөлд хүрэл, ган­цаарчилсан төрөлд тус улсын аваргатай дөрвөн үе тоглосоноос гуравт нь хо­жигдож мөнгөн медаль дээр буусан юм.

-Та энэ тэмцээнд авар­галснаар ОХУ-ын Казаньд болох универсиадад орол­цох эрх авч байна уу. Бэлтгэл ханасан уу?

-Энэ тэмцээний өмнө дотоод дахь өрсөлдөөн хүлээж байна. Маргааш эхлэх улсын универ­сиа­дын тэмцээнд гуравдугаар байр эзлэхэд л явах эрхтэй болно.   

-Тун удахгүй ганцаар­чилсан төрлийн дэлхийн аварга болно. Энэ тэм­цээнд амжилттай оролцсон тамирчины рейтинг ахих боломжтой. Таны чансаа хэдэд эрэмбэлэгдэж бай­гаа билээ?

-Монголын тамирч­даас хамгийн өндөр рей­тингт Э.Галбадрах багш хүрч байсан юм билээ. Бид олон улсын тэмцээнүүдэд тэр бүр ордоггүй учраас чансаагаа ахиулах боломж тааруу. Чансаа өсгөх зэ­рэг­лэл өндөртэй олон тэм­цээний гадна үлддэг. Тэм­цээн уралдаанд явах зар­дал, санхүүгийн бэрхшээл бидний амжилт болон чан­саанд нөлөөлдөг гэх үү дээ.

-Танай гэр бүлийнхэн энэ спортоор түлхүү хи­чээл­лэдгийг мэдэх юм бай­на. Таны тэмцээний бэлт­гэлийг хэн хангадаг вэ?

-Гэр бүлийнхэн чинь таны бэлтгэлийг хангадаг уу гэж асуух гээд байна уу. Би тэмцээний бэлтгэлээ нэг хүнтэй хийдэггүй. Өнөө­дөр Л.Алтантулгатай, маргааш С.Төрболдтой гэх жишээтэй.

-Таны охин дүү мөн л ширээний теннисээр хи­чээл­лэдэг байх аа. Дүү тань хэд хүрч байгаа би­лээ. Ямар амжилт гарга­сан бэ?

-Миний дүү Э.Отгон­жар­гал энэ жил 17 хүрч байна. Отгоо маань өсвө­рийн улсын аваргаас хоёр мөн­гөн медаль хүртсэн. Дүү­гээ энэ спортод их ам­жилт гаргана гэж боддог шүү.