“Болор цом-30” наадамд Н.Гантулга түрүүлж, Б.Мягмаржав дэд байр эзэллээ

1-р сарын 10, 2013 10:01 pm Нийтлэгч: Ангилал Урлаг , Урлаг, спорт Уншсан: 13002
“Болор цом-30” наадамд Н.Гантулга түрүүлж, Б.Мягмаржав  дэд байр эзэллээ

Оны шилдэг шүлгийг   тодруулдаг  “Болор цом” наадам өчигдөр УДЭТ-т боллоо.  30 дахь удаагийн энэ наадмын сүүлчийн даваанд яруу найрагч Б.Галсансүх, Ай.Төмөр-Очир, О.Цэнд-Аюуш, Б.Мягмаржав, Н.Гантулга нар тунаж шүлгээ уншлаа.

Тэргүүн байрыг  Н.Гантулга “Уулсын сэтгэлгээний тэлэлт” шүлгээр хүртэж Эгшиглэнт эхийн хишигт яруу найрагчаар тодорлоо.  
Б.Мягмаржав аман хүзүүдэж,  гуравдугаар байрт О.Цэнд-Аюуш,  дөрөвт Б.Галсансүх, айргийн тавд  Ай.Төмөр-Очир шалгарлаа.

Наадмын тэргүүн шүлгийг толилуулъя.

Уулсын сэтгэлгээний тэлэлтийг…

Уулсын сэтгэлгээний тэлэлтийг би дотоод ахуйгаасаа мэдэрдэг
Уулсыг хэчнээн хайрлаж ижий шигээ, амраг бүсгүй шигээ санана
Уулс намайг яг л тэгж хайрлан толгод шигээ, хэдэн зууны өмнө
өврөөс нь алга болсон
Уусмал ягаан чулууд шигээ санана, зүрхнийхээ хөндүүр шиг л хүлээж авна

Уулсын сэтгэлгээний тэлэлтийг энэрэн хайрлахуйн цаг хугацаанаас мэдэрдэг
Эрх жаахан үр минь хүзүүнээс зүүгдэн шулганаад дээдийн жаргалыг амсдаг ч
Элэг зүрхний таталцлын гүүр-ганихралын дамжуурга модны үзүүрээс
Дэлхийн татах хүч шиг уулс ер бусаар соронздон, хацартаа энхрийлэн наадаг

Уулсын сэтгэлгээний тэлэлтийг омог бардамналын хөх дөлөн дундаас мэдэрдэг
Өөрөө өөрийгөө ч шатааж чадах эр зоригтоо эрдэн
энэхэн замбуулинд багтаж ядахад,
Өмнө минь мэхийсэн олон сөхөрсөн согоо шиг санагдан
хангайн буга шиг сэрвэлзэхэд
Өөрийн мэдэлгүй уулсын сүр хүчээр дутан жижигхээн толгодынх нь өвөрт
нялх янзага шиг бохирон унадаг даа

Уулсын сэтгэлгээний тэлэлтийг гоо сайхны хамгийн төгс илэрхийллээс мэдэрдэг
Эмзэг ялдам охидын арван долоохон нас сэтгэлийн зовлон болж
Эгчмэд хонгор бүсгүйн уяхан ааль, ер бусын бие галбир
нүдийг минь дахин цэлмээхэд
Цээжнийхээ гүнд уртаар санаа алдаад өнөө муу зүрх минь уулсын зүг хэдийнэ
алсарч оддог

Уулсын сэтгэлгээний тэлэлтийг яруу найргийнхаа эрчимлэг долгионоос мэдэрдэг
Хүмүүний ертөнцийг цагийн цагт гэрэлтүүлэн асаах ид шидийн наран бөмбөлөг
цээжинд минь байгааг
Хүслийн цэнхэрлиг огторгуйд оюун билгийнхээ даль жигүүрээр
судрын чуулган титэмлэж явааг уулс л мэдэрнэ
Цагийн буданд ч надаас өмнө мянга мянган жил найрагч нөхдийг минь
ингэж л мэдэрч байсан биз ээ
Уулсын сэтгэлгээний тэлэлтийг…