Б.Хурц хүлээгдэж байсан Элчин сайд нарыг хөлдөө чирэв үү?

12-р сарын 25, 2017 8:41 am Нийтлэгч: Ангилал Ерөнхийлөгч , Улс төр Уншсан: 75
12-25-2h

Т.БАТСАЙХАН

Өнгөрсөн баасан гаригт Ерөнхийлөгч Ерөнхий сайд У.Хүрэлсүхэд Элчин сайд нарын томилгоотой холбоотой асуудлаар албан бичиг хүргүүллээ.

ТЕГ-ын дарга асан Б.Хурцыг БНСУ-д суух Элчин сайдаар томилох боломжгүй гэж үзэж буйгаа  Ерөнхийлөгч илэрхийлсэн байна. УИХ-ын дарга М.Энхболд өнгөрсөн пүрэв гаригт чуулганы нэгдсэн хуралдаан дээр томилгоог Ерөнхийлөгчтэй зөвшилцсөний хүрээнд хийсэн гэсэн ч Ерөнхийлөгч өөр байр суурьтай байгаа гэдгээ Ерөнхий сайдад илгээсэн албан бичигт дурджээ.

Ерөнхийлөгч “ТЕГ-ын дарга асан Б.Хурцыг БНСУ-д Элчин сайдаар явуулах эсэх асуудалд хүлээзнэх шаардлага үүссэн. Учир нь Б.Хурцыг Элчин сайдаар томилох тухайд УИХ-тай зөвшилцөх явцад анхаарал татсан олон асуудал яригдсан тул энэ бүхнийг тодорхой болтол Ерөнхийлөгчийн зүгээс томилж явуулах боломжгүй” гэжээ.

Мөн Ерөнхийлөгч ганцхан Б.Хурцад хориг тавьсангүй. Хүлээгдэж буй  Элчин сайд нарын асуудлыг хөндөж заримыг нь томилох боломжгүй гэдгээ илэрхийлэв. Тухайлбал Япон Улсад суух Онц бөгөөд Бүрэн эрхт Элчин сайдаар Г.Тэнгэрийг, Канад Улсад суух Онц бөгөөд Бүрэн эрхт Элчин сайдаар Н.Чимгүүндарийг, АНУ-д суух Онц бөгөөд Бүрэн эрхт Элчин сайдаар Ё.Отгонбаярыг томилох тухай асуудлыг УИХ-ын хуралдаанаар хэлэлцэн зөвшилцсөн. Гэвч Элчин сайдад нэр дэвшигчид тухайн албыг хаших насны шалгуурыг хангаагүй, томилохдоо төрийн албаны мерит зарчмыг зөрчсөн болон Монгол Улсын гуравдагч хөрш орнуудад суух Элчин сайдын өндөр хариуцлагатай албыг зохих төвшинд хашиж чадахгүй гэж үзэж байгаа учраас Итгэмжлэх жуух бичгийг гаргах боломжгүй байна” гэжээ.

Түүнчлэн Элчин сайдаас чөлөөлөгдөх өргөдлөө өгсөн С.Баяр, Монгол Улсаас Шведийн Вант Улсад суугаа Онц бөгөөд Бүрэн эрхт Элчин сайд М.Энхсайхан нарыг эгүүлэн татах асуудлыг зөвшилцөхөөр УИХ-д хандсан байгаа. Элчин сайд С.Баяр нутагтаа бүрмөсөн буцах өргөдлөө өгснийг Засгийн газрын 2017 оны арванхоёрдугаар сарын 13-ны өдрийн хуралдаанаар хэлэлцэн шийдвэрлэсэн бол Элчин сайд М.Энхсайханыг өнөөг хүртэл эгүүлэн татах асуудлыг УИХ хэлэлцээгүй байна.

Иймд эдгээр асуудалд анхаарахын сацуу дээр дурдагдсан дөрвөн улсад суух Элчин сайдад томилуулах хүмүүсийн нэрсийг холбогдох хуулийн дагуу ойрын үед шинээр санал болгоно уу” хэмээжээ. Тэгэхээр Б.Хурцын томилгоо Ерөнхийлөгч дээр гацлаа. Б.Хурц ганцаараа биш хүлээгдэж байсан Элчин сайд нарыг хөлдөө чирээд үлдэх нь бололтой.

Эх сурвалж: “Зууны мэдээ” сонин

Сэтгэгдэл бичих

Таны и-мэйл хаягийг нийтлэхгүй.

Сэтгэгдэл *
Нэр *
E-Mail *